Fyrsta skóflustunga tekin að nýju orlofshúsi.

Stjórn Félags stjórnenda tók nýverið fyrstu skóflustunguna að nýju orlofshúsi félagsins að Brekkuheiði 17 í Brekkuskógi. Húsið verður staðsett við hlið eldra orlofshúss félagsins að Brekkuheiði 15. Markar þessi framkvæmd mikilvægt skref í áframhaldandi uppbyggingu orlofsmála fyrir félagsfólk en á síðasta ári seldi félagið tvö eldri hús í uppsveitum Árnessýslu.

Verktakinn SG Hús á Selfossi sér um byggingu hússins, en fyrirtækið byggði einnig eldra húsið að Brekkuheiði 15 sem reist var árið 2008. Það hús hefur notið mikilla vinsælda meðal félagsmanna frá upphafi og verið eftirsóttur kostur. Nýja húsið mun styrkja enn frekar þjónustu félagsins og auka framboð á orlofskostum á einum vinsælasta ferðamannastað landsins. Brekkuskógur er þekktur fyrir fjölbreytta og fallega náttúru, auk fjölmargra útivistarmöguleika. Í næsta nágrenni eru meðal annars gönguleiðir að Brúarárfossi og um Brúarárskörð. Þá er stutt að heimsækja Gullfoss og Geysi, auk Úthlíðar þar sem meðal annars má finna golfvöll.  Einnig er stutt að skjótast í sund í Reykholti í Biskupstungum eða á Laugarvatni eða kanna nýtt baðlón í Laugarási.

Með þessari uppbyggingu er Félag stjórnenda að bregðast við góðri eftirspurn félagsfólks eftir orlofskostum og horfa til framtíðar með það að markmiði að efla enn frekar orlofskosti sína.

Á meðfylgjandi mynd má sjá hluta af stjórn félagsins við þetta ánægjulega tilefni.